Asnjë delegat nga Partia Demokratike e Shqipërisë nuk është ftuar të marrë pjesë në Kongresin e Partisë Popullore Europiane që do të mbahet në Roterdam.
PD-ja e Shqipërisë është e vetmja parti që nuk ka asnjë të ftuar në këtë eveniment të rëndësishëm për partitë e djathta europiane, ku pritet të votohet edhe për presidentin e ardhshëm të PPE-së. Ndërkohë që nga vende si Serbia dhe Maqedonia e Veriut ka përkatësisht nga katër delegatë me të drejtë vote, nga Partia Demokratike e Shqipërisë ka zero, siç mund të shihet edhe në foton më poshtë.
Kujtojmë se më 19 maj, deputeti kristiandemokrat në Parlamentin Gjerman, Gunther Krichbaum, folës i grupit parlamentar CDU/CSU për çështje të Bashkimit Evropian tha nëse kjo forcë politike kthehet te e djeshmja duke nënkuptuar rikthimin e Berishës do të angazhohet për ta pezulluar PD-në nga PPE-ja.
“Më vjen shumë keq për zhvillimet në PD dhe nuk jam i vetmi. Sigurisht që është çështje e vetë partisë se kë dëshiron të zgjedhë për lider. Neve nuk na takon të ndërhyjmë. Por kjo do të thotë edhe për ne dhe për mua personalisht, se unë do të vazhdoj të punoj dhe ta mbështes PD-në vetëm nëse jepet një sinjal largpamës në përzgjedhjen e kryetarit”, tha Krichbaum./FW
