Seanca parlamentare e ditës së sotme është shoqëruar me tensione të shumta. Ndërkohë që Grupi Parlamentar i Partisë Demokratike ka bërë të ditur se pas zhurmës dhe kaosit në Kuvend, ka nisur procedurat për shkarkimin e kryetares së Parlamentit, Lindita Nikolla.
Në njoftim bëhet me dije se veprimi është ndërmarrë pas ndërprerjes së seancës dhe mos lejimit të deputetëve të DP të thonin fjalën e tyre.
Kujtojmë që grupimi i Berishës bllokoi foltoren duke kërkuar me forcë paraqitjen e kryeministrit Edi Rama në Kuvend për të dhënë sqarime për përfshirjen për çështjen “McGonigal”. Kryetarja e Kuvendit Lindita Nikolla përjashtoi nga seanca plenare Sali Berishën, por ky i fundit nuk iu bind kërkesës së saj për t’u larguar nga Foltorja dhe hyri në një lidhje “live” në Facebook.
Njoftimi:
NJOFTIM I GRUPIT PARLAMENTAR TË PARTISË DEMOKRATIKE
Sot Edi Rama, i kapur në flagrancë nga drejtësia amerikane se ka korruptuar dhe bashkëpunuar me një angjent të FBI të lidhur me Rusinë, jo vetëm iu fsheh Kuvendit, por detyroi Lindita Nikollën të mbyllë Parlamentin.
Veprimi i sotëm i Kryetarës së Kuvendit, është akt i paprecedent në 32 vjet demokraci. Në shkelje flagrante të Rregullores, Kryetarja e Kuvendit i mohoi të drejtën deputetëve të Kuvendit që të diskutojnë për çështjet e përfshira në Rendin e Ditës, duke përdhosur parlamentarizmin dhe duke minuar funksionimin demokratik të Kuvendit.
Ndërsa drejtësia amerikane asgjësoi politikisht Edi Ramën, duke faktuar para botës mbarë, lidhjen e tij korruptive me një zyrtar të FBI-së, të lidhur me Rusinë, Kryetarja e Kuvendit asgjësoi Parlamentin për llogari të Edi Ramës.
Gjithashtu, nga sot Parlamenti i Shqipërisë ka humbur mundësinë për të funksionuar në mënyrë demokratike dhe përgjegjës për këtë janë vetëm Edi Rama dhe Lindita Nikolla.
Për shkak të shkeljes flagrante të Rregullores, minimit të parlamentarizmit dhe funksionimit demokratik të Kuvendit, Grupi Parlamentar i Partisë Demokratike, bazuar në pikën 4, të nenit 114 të Rregullores, ka vendosur të nis procedurën për shkarkimin e Kryetares së Kuvendit znj. Lindita Nikolla.
