Emri i Ndue Kolës, drejtues i kompanisë ANK shpk dhe ish deputet i Partisë Socialiste, rikthehet në qendër të debatit publik pas bllokimit të aksit Librazhd–Elbasan. Segmenti, pjesë e projektit “Zgjerimi i rrugës Elbasan–Qafë–Thanë, Faza IV”, me fond limit 23.6 milionë euro, po shoqërohet me akuza për dëmtime të rënda mjedisore dhe probleme serioze në zbatimin e punimeve.
Sipas të dhënave mbi projektin, ANK ka përdorur inerte të marra nga shtrati i lumit Shkumbin për ndërtimin e rrugës. Ndërhyrjet në zonë dyshohet se kanë ndikuar në destabilizimin e terrenit, duke shkaktuar lëvizje të kodrës dhe duke krijuar rrezik për qarkullimin. Aksi është bllokuar, ndërsa situata në terren paraqitet e ndërlikuar dhe kërkon ndërhyrje teknike për stabilizim.
Kompania ANK ka qenë më parë përgjegjëse edhe për ndërtimin e aksit Korçë–Ersekë, një tjetër segment që është përballur me problematika të ngjashme. Punimet për këtë rrugë nisën në qershor 2013. Lotin e parë, me gjatësi 17.6 kilometra, e fitoi ANK me një ofertë rreth 17 milionë euro. Pas disa vitesh zvarritjeje, në vitin 2017 u hap një tender tjetër prej 4 milionë eurosh për punime shtesë, që u fitua sërish nga e njëjta kompani. Në total, për rreth 4 kilometra rrugë me gjerësi maksimale 8.5 metra, u shpenzuan rreth 20 milionë euro.
Dy vite më parë, aksi Korçë–Ersekë u shemb pjesërisht. Për këtë projekt, inxhinieri Romeo Nazarko kishte paralajmëruar për rrezikun e shembjes, duke e cilësuar projektin të gabuar. Më 30 tetor 2020, ai depozitoi në SPAK një kallëzim penal ndaj drejtorit të asaj kohe të Autoritetit Rrugor Shqiptar, ministres së Infrastrukturës dhe kompanisë ANK.
Në kallëzimin e tij, Nazarko deklaronte:
“Paqartësi midis asaj që shpreh projektuesi te paragrafi ‘Planimetria’, se ‘Aksi i rrugës orientohet nga perëndimi duke qenë nën ndriçimin diellor, gjë që do ndikojë pozitivisht në shkrirjen e dëborës dhe largimin e ujërave nga trupi i rrugës’, kurse te paragrafi ‘Vendndodhja e objektit’ shprehet se ‘kjo pjesë e rrugës kalon në një terren me pjerrësi të madhe, ku përshkon vargun kodrinor-malor në anën veriore të Pllajës së Kolonjës’. Projektuesi, për këtë element shumë të rëndësishëm për zonën, ku reshjet e borës janë të larta dhe sjellin vështirësi në lëvizjen e mjeteve, është i paqartë se në cilën anë ndodhet. Kjo për faktin se projektuesi ka firmosur me sy mbyllur projektin dhe këtë e vërteton se rilevimin në terren nuk e ka bërë inxhinieri gjeodet i studios së projektimit, por e kanë bërë inxhinierët e kompanisë që do të merrte zbatimin e punimeve”.
Rastet e Korçë–Ersekë dhe Librazhd–Elbasan kanë shtuar pikëpyetjet mbi cilësinë e projekteve infrastrukturore dhe mbikëqyrjen e tyre. Ndërkohë, autoritetet përkatëse pritet të përcaktojnë përgjegjësitë dhe hapat e mëtejshëm për të garantuar sigurinë në një nga akset më të rëndësishme të vendit.
