Komisioni i Ekonomisë ka miratuar këtë të martë projektligjin për privatizimin dhe dhënien në përdorim të pronave shtetërore. Drafti, një propozim i deputetit socialist Eduard Shalsi hasi në kundërshtinë e opozitës, ku nuk munguan as përplasjet mes palëve. Në ndryshimet e këtij ligji përcaktohet se privatizimi mund të bëhet në forma të ndryshme nëpërmjet shitjes me ankand ose tjetërsimit.
Po ashtu, në ndryshimet e bëra, prona shtetërore mund të këmbehet me pronë private. Për këtë do të kujdeset Ministria e Financave. Ndërsa sa i përket shembjes së objekteve shtetërore në funksion të zhvillimit, subjektit privat i jepet e drejta ti shembë ato. Kjo vetëm në rastin kur është dhënë leja për ndërtimin në zonë.
Pas miratimit në Komisionin e Ekonomisë, projektligji do të kalojë në Komisionet e tjera Parlamentare dhe pas përmbylljes së diskutimeve do të kalojë në Parlament. Për votimin e tij mjafton shumica e thjeshtë.
