Nuk ka afat të prerë për dialogun, por sa më shumë që zgjat procesi i dialogut, aq më i vështirë do të jetë. SHBA dëshiron një marrëveshje që përfundon me njohje të ndërsjellë. Kështu ka deklaruar zëvendësndihmës sekretari amerikan i Shtetit, Matthew Palmer, i cili në një intervistë për televizionin publik të Kosovës, ka thënë se çështja e dialogut është mirë të kryhet sa më shpejt të jetë e mundur.
Sa i përket Asociacionit, Palmer ka thënë se palët e përfshira në dialog duhet të respektojnë të gjitha marrëveshjet e arritura deri më tani, shkruan Express. “Palët duhet t’i respektojnë të gjitha marrëveshjet e arritura. E kuptoj që ka parametra të marrëveshjes së Asociacionit që duhet të diskutohen, por kjo s’duhet ta pengojë procesin. Nuk do t’ju tregojë se çfarë duhet të bëjë Kosova. Qeveria e Kosovës vendos se si do t’i qaset kësaj çështje”, tha Palmer.
Palmer gjithashtu deklaroi se vendimi për ndryshime kushtetuese, të cilat janë diskutuar së fundmi, i takon Kosovës. “Kosova duhet të shohë se cilat janë mundësitë e saj, çka ka Kosova për t’i dhënë këtij procesi. Nuk është e lehtë”. Ndërsa sa i përket ndryshimit të kufijve, Palmer u shpreh: “Nuk mendoj se është në agjendë një gjë e tillë. Nuk më takon mua t’i identifikoj vijat e kuqe në këtë proces. Pala kosovare ka qenë mjaft e qartë në këtë çështje”.
