Drejtori i Përgjithshëm i Tatimeve Ceno Klosi është skeduar për vendosje të pasurisë në mënyrë jo të ligjshme, pasi nuk i justifikon dot ato që ai ka deklaruar se posedon. Kjo ka ngritur dyshime të forta në lidhje me veprimtarinë e tij në administratën shtetërore.
Bazuar në të dhënat e karrierës së tij profesionale të paraqitura në faqen zyrtare të Drejtorisë së Përgjithshme të Tatimeve, Ceno Klosi nga përfundimi i shkollës në 2002 ka punuar për 13 vite si specialist dhe drejtues sektorësh në banka të nivelit të dytë dhe më pas gjatë periudhës 2015-2021 ka mbajtur pozicionin si Drejtor i Departamentit Ekonomik në OSHEE.
Në qershor të 2021 u emërua Drejtor i Përgjithshëm i Agjencisë Kombëtare Ujësjellës- Kanalizime dhe Mbetjeve të ngurta, ndërsa me VKM 625, datë 22/10/2021 është emëruar drejtor i Përgjithshëm i Tatimeve.
Gjëja që ngre dyshimet më të mëdha është se Klosi ka pasur një rritje të pasurisë vetëm pas marrjes së detyrave shtetërore, gjë e cila hedh dyshime për veprimtari të paligjshme, korrupsion dhe shpërdorim detyre. Kjo konkretizohet në faktin se Ceno Klosi gjatë periudhës që ka qenë drejtues bankash ka arritur të blejë me një kredi prej 45 mijë eurosh një apartament në Tiranë me vlerë prej 6.8 milionë lekë me sipërfaqe 93.2 m2. Ndërsa pas marrjes së detyrave shtetërore në tetor 2016 një vit pasi ishte punësuar në OSHEE si drejtor ekonomik Ceno Klosi deklaron se ka blerë me një kredi 200 mijë euro një apartament tjetër prej 160 m2 në Tiranë. Dy vite e katër muaj pas blerjes së apartamentit të dytë, në janar 2019 Ceno Klosi hap një biznes në Angli, me adresë një vilë luksoze. Por nuk mbaron me kaq Klosi ka marrë qese të mëdha për të bërë pazarin, pasi në qershor 2021, muaj kur është emëruar drejtor i Përgjithshëm i Agjencisë Kombëtare të Ujësjellës- Kanalizimeve, Klosi blen një apartament tjetër me vlerë 280 mijë euro, nga të cilat 60 mijë euro vijnë nga kursimet dhe rreth 150 mijë euro janë marrë kredi. Gjatë kësaj kohe Klosi deklaron se disponon mbi 48 mijë paund depozitë nga kursime familjare dhe depozita të tjera me vlerë gati 30 mijë euro. Ndërkohë bashkëshortja e tij deklaron se ka një depozitë bankare me rreth 100 mijë euro.
Për t’u theksuar është se Ceno Klosi nuk disponon të ardhura nga biznesi privat në Shqipëri dhe nuk ka ndonjë aktivitet privat. Iu mbetet autoriteteve për të hetuar në thellësi pasurinë e Ceno Klosit i cili gjatë 13 viteve punë në sektorin privat arriti të blejë vetëm një apartament 6.8 milionë lekësh, ndërsa gjatë 6 viteve në detyra shtetërore vuri një pasuri prej gati 900 mijë euro.
