Në disa zona të Tiranës, nivelet e zhurmës janë problematike, sidomos në ato me trafik të lartë dhe aktivitet ekonomik intensiv.
Disa nga zonat më të prekura përfshijnë “Pazarin e Ri”, “Sheshin Italia” dhe “Rrugën e Kavajës”, ku shpesh niveli i decibelëve kalon kufijtë e rekomanduar për një ambient të shëndetshëm.
Kjo është një prej gjetjeve të Raportit Vjetor “Cilësia e ajrit dhe ndotja akustike”, i realizuar nga organizata Co-PLAN me mbështetje të qeverisë suedeze.
Raporti përfshin monitorimin që u krye në 13 stacione të vendosura në unazën e vogël të Tiranës gjatë periudhës gusht-dhjetor 2024, duke mbuluar tre stina të ndryshme: verën, vjeshtën dhe fillimin e dimrit.
Matjet ndihmuan në vlerësimin e ndikimit të ndotjes akustike dhe ajrore, duke marrë parasysh faktorët sezonale, temperaturat, reshjet dhe aktivitetet ndërtimore. Zona të tjera me nivele të larta zhurme përfshijnë Kryqëzimin e 21 Dhjetorit, Zogun e Zi, Sheshin Skënderbej, dhe Piramidën.
Gjatë raundeve të ndryshme të matjeve, u vërejt se Sheshi Italia kishte nivelin më të lartë të zhurmës, me 72.2 dB në raundin e parë, ndërsa Pazari i Ri dhe Treni ishin gjithashtu ndër zonat më të zhurmshme, duke arritur nivele të zhurmës deri në 67.5 dB. Ekspozimi i vazhdueshëm ndaj ndotjes akustike mund të shkaktojë probleme shëndetësore, duke përfshirë stres, lodhje kronike, çrregullime të gjumit dhe dëmtim të dëgjimit.
Për të reduktuar këto ndikime, raporti rekomandon masa për uljen e nivelit të zhurmës dhe ndotjes së ajrit, përfshirë shtimin e sipërfaqeve të gjelbra, mbjelljen e bimëve autoktone dhe nxitjen e gjelbërimit vertikal./ SCAN
