Një tjetër tentativë për transfertë të parave në mënyrë të kundërligjshme është goditur nga Policia Kufitare e Rinasit.
Në pranga ka rënë një i ri 28-vjeçar me iniciale L.GJ., të cilit i janë sekuestruar 16 mijë euro.
Shumën e parave ai e mbante në një çantë brezi, duke tentuar t’i kalonte pa i deklaruar para autoriteteve doganore.
I riu është proceduar penalisht për veprën penale ‘Mosdeklarim i të hollave dhe sendeve me vlerë në kufi’.
Kujtojmë se disa ditë më parë në aeroportin e Rinasit u ndalua një 20-vjeçare, pasi nuk deklaroi një shumë prej 12.450 euro.
Njoftimi i plotë
Policia Kufitare e Rinasit parandalon dhe godet një tjetër rast të tentativës për transfertë të parave në mënyrë të kundërligjshme.
Sekuestrohen 16 000 euro, procedohet penalisht poseduesi.
Në vijim të zbatimit të masave të shtuara për luftën ndaj krimeve ndërkufitare, si rezultat i kontrolleve të shtuara, Policia Kufitare e Rinasit, pas dyshimeve të lindura në lidhje me motivin e udhëtimit ka kaluar për kontroll në vijën e dytë shtetasin L. Gj., 28 vjeç.
Gjatë kontrollit të ushtruar në vijën e dytë punonjësit e Policisë Kufitare i kanë gjetur këtij shtetasi në çantën e brezit një shumë prej 16 000 eurosh të cilat ky shtetas po tentonte t’i kalonte pa i deklaruar para autoriteteve doganore.
Nga Policia Kufitare e Rinasit u bë sekuestrimi i shumës së eurove në cilësinë e provës materiale dhe në përfundim të veprimeve të para hetimore u proceduar penalisht shtetasi L. Gj., për veprën penale ‘Mosdeklarim i të hollave dhe sendeve me vlerë në kufi’.
