Ambasadori i Bashkimit Evropian në Shqipëri, Luigi Soreca ka reaguar pas lajmit se Komisioni Evropian ka dhuruar në emër të Bashkimit Evropian, një fond prej 90 milion euro për pandeminë.
Me anë të një postimi në “Twitter”, Soreca shkruan se Bashkimi Evropian i qëndron në krah Shqipërisë dhe qytetarëve të saj edhe në ditë të vështira. Ambasadori ndër të tjera ka shtuar se ky program është një demonstrim i fortë dhe konkret se BE mbështet vendin tonë në një kohë krize.
“COVID19 nuk njeh kufij: BE qëndron në krah të Shqipërisë dhe qytetarëve të saj në këto kohë të vështira. Ky disbursim i parë prej 90 milion € , do të kontribuojë në zbutjen e pasojave të rënda negative socio-ekonomike të pandemisë, duke mbështetur kategoritë e prekshme në Shqipëri. Një disbursim i dytë i 90 milion eurove të tjera do të pasonte më vonë këtë vit, me përmbushjen e kushteve të politikës. Ky program është një demonstrim tjetër i fortë dhe konkret i BE-së me Shqipërinë në një kohë krize të paparë.”, ka shkruar në postimin e tij Ambasadori i Bashkimit Evropian, Luigi Soreca.
Kujtojmë se Komisioni Europian në emër të BE-së, ka disbursuar sot 90 milionë euro për Shqipërinë, në kuadër të programit të ndihmës makro-financiare (MFA) lidhur me COVID-19. Shqipëria është i teti vendi që merr një disbursim nga paketa emergjente e MFA-së prej 3 miliardë eurosh për dhjetë vende partnere të zgjerimit dhe fqinjësisë, që synon t’i ndihmojë ato të kufizojnë pasojat ekonomike të pandemisë së koronavirusit.
Ky disbursim do të kontribuojë në zbutjen e pasojave të rënda sociale dhe ekonomike të pandemisë së koronavirusit në Shqipëri. Transaksioni i sotëm pason miratimin e një Memorandumi të Mirëkuptimit me Shqipërinë, i cili përcakton kushtet e politikës që duhet të plotësohen për disbursimin e këstit të dytë prej 90 milion €.
