Ka përfunduar në pranga autori i zjarrvënies që shkaktoi dëme të mëdha në lagjen e Shimve në Rrogozhinë.
Bëhet fjalë për 41-vjeçari Iljaz Rusta, banues në Rrogozhinë, i cili akuzohet për veprën penale “Shkatërrimi me zjarr i mjedisit pyjor”.
Nga hetimet rezulton se Rusta kishte ndezur zjarr për të djegur mbeturina në oborrin e një banese, por për shkak të erës së fortë, flakët kanë dalë jashtë kontrollit.
Zjarri është përhapur me shpejtësi, duke përfshirë rreth 10 hektarë me bimësi, qindra pemë ulliri e pemë frutore, si dhe duke rrezikuar seriozisht disa banesa në afërsi.
Njoftimi i policisë
Rrogozhinë- Ndezi zjarr dhe për pasojë u dogjën qindra pemë ulliri, pemë frutore dhe 10 ha bimësi, si dhe u rrezikuan banesat përreth, Policia identifikoi, kapi dhe arrestoi autorin e dyshuar.
Shërbimet e Policisë, me marrjen e njoftimit se në lagjen e Shimve, bashkia Rrogozhinë, kishte rënë zjarr dhe ishte përhapur në një sipërfaqe të madhe, menjëherë kanë shkuar në zonën ku kishte rënë zjarri dhe vijuan punën për identifikimin dhe kapjen e autorit.
Ndërkohë, shërbimet zjarrfikëse, me ndihmën e shërbimeve të Policisë, pas disa orësh, bënë të mundur fikjen e zjarrit.
Si rezultat i veprimeve të shpejta, pas disa minutash, është bërë i mundur identifikimi, kapja dhe arrestimi për veprën penale “Shkatërrimi me zjarr i mjedisit pyjor”, i autorit të dyshuar, shtetasit I. R., 41 vjeç, banues në Rrogozhinë.
Nga veprimet hetimore rezultoi se ky shtetas ka qenë duke punuar në oborrin e një banese dhe ka ndezur zjarr aty, për djegien e mbeturinave. Si pasojë e erës së fortë, zjarri është përhapur shpejt duke djegur një sipërfaqe toke me bimësi rreth 10 ha, qindra pemë ulliri dhe pemë frutore, si dhe ka vënë në rrezik serioz përfshirjen nga flakët, të banesave përreth.
Materialet procedurale i kaluan Prokurorisë, për veprime të mëtejshme.
Policia e Shtetit apelon për qytetarët që të mos shkaktojnë zjarr në asnjë rast, pasi do të përballen me ligjin.
