Shqipëria do të përballet sonte në mbrëmje me Islandën, në ndeshjen e fundit të grupit në Ligën e Kombeve, teksa kuqezinjtë do të zbresin me një risi në fushë.
Pak më parë janë publikuar edhe formacionet e kësaj sfide, e cila në fund të fundit nuk do vlejë për asgjë tjetër, veçse për statistikë, pasi Izraeli ka siguruar vendin e parë.
Ndeshja e fundit direkte mes të dy ekipeve ka përfunduar 1-1. Golat shënoheshin nga Seferi dhe Thorsteinsson J. D.
Cikalleshi është lojtari me më shumë ndeshje në grupin aktual po të mos llogariten Berisha dhe Hysaj, pasi sfida me Islandën do të jetë e 50-a e tij më kombëtaren, një më shumë se Abrashi i cili do të luajë ndeshjen e 49. Trajneri i kuqezinjve, Edy Reja ka preferuar të bëjë disa ndryshime. Në stol janë Hysaj dhe Broja, ndërsa spikasin aktivizimet e Lenjanit dhe Veselit.
Përfaqësuesja jonë është në vendin e 3-të me 1 pikë. Islanda është në vendin e 2-të me 3 pikë. Teksa jemi disa orë përpara nisjes, mësohet se janë shitur rreth 6 mijë bileta për këtë sfidë.
Pikat e shitjes janë në stadiumin “Air Albania” dhe “Selman Stërmasi”, por edhe online në faqen e FSHF-së.
Çmimet fillonin nga 750 lekë të reja, deri në biletat VIP që arrijnë në 18 mijë lekë të reja.
