Në prag të ndeshjes vendimtare kundër Kroacisë, Igli Tare, në një intervistë për “Süddeutsche Zeitung”, ka ndarë mendimet e tij për performancën dhe pritshmëritë për ekipin kombëtar shqiptar. Duke analizuar fazën kualifikuese, Tare vlerësoi suksesin e kuqezinjve, të cilët përfunduan si fitues të grupit, por theksoi se mungesa e përvojës në turne të mëdha si ky ishte një pengesë e madhe.
“Ata thjesht nuk kanë përvojë në këtë lloj turneu dhe ky ishte problemi kundër Italisë. Filluan të prisnin dhe të mbroheshin thellë. Por ky është një ekip që nuk mund ta bëjë këtë. Dhe po, kjo më zhgënjeu. Ai bëri një punë vërtet të mirë në kualifikuese, pa pasur pak kohë për të punuar vërtet me këtë ekip. Edhe pse i mungon ende përvoja në një turne si ky, prisja pak më shumë prej tij”, tha Tare.
Duke folur për sfidën e ardhshme kundër Kroacisë, Tare theksoi rëndësinë e personalitetit dhe përvojës në fushë. “Duhet të fitojmë shumë përvojë në këtë turne, por duhet të luajmë edhe me personalitet. Skuadra jonë nuk ka asgjë për të humbur! Ata u vunë në short kundër tre skuadrave që janë jo vetëm favoritë për të fituar grupin, por edhe pretendentët për titull: Italia, Kroacia, Spanja – për mua ato janë në të njëjtin nivel me Gjermaninë”, shtoi ai.
Tare pret një lojë fizike dhe kërkoi përmirësime të mëtejshme në mbrojtje. Ai bëri thirrje që çdo lojtar të japë maksimumin për ekipin dhe të sakrifikojë veten deri në rraskapitje për mbrojtjen e fanellës kombëtare. “Skuadra jonë duhet të tregojë uri dhe gatishmërinë për të vdekur në fushë për fanellën”, përfundoi ai.
Këto komente vijnë në një moment kritik për Shqipërinë, e cila po përgatitet të përballet me një nga ekipet më të forta të grupit dhe të tregojë qëndresën dhe vendosmërinë e saj në një skenë ndërkombëtare.
