Jetmir Muçollari, pronari i hotelit “Driloni” në Pogradec, është arrestuar nga policia pas një përplasjeje fizike të ndodhur një ditë më parë me kryeplakun e Tushemishtit, Ilirjan Tasellari, dhe një person tjetër.
Sherri mes tyre kishte në qendër një rrugë, për të cilën Muçollari pretendonte se ishte pronë private.
Pas incidentit, policia nisi hetimet dhe konstatoi se Muçollari kishte kryer ndërtime pa leje në një sipërfaqe toke që, ndonëse ai e pretendon si pronë të tij, rezulton të jetë pjesë e një zone të mbrojtur.
Jetmir Muçollari tashmë përballet me akuza për veprat penale të “shpërdorimit të tokës” dhe “ndërtimit të paligjshëm për qëllime përfitimi”.
Ndërkohë, Inspektorati i Mbrojtjes së Territorit i Pogradecit kishte urdhëruar pezullimin e punimeve në këtë zonë një javë më parë. Dosja i është kaluar Prokurorisë, e cila do të vijojë hetimet për rastin.
