Policia e Durrësit ka arrestuar ish-kryeinspektorin e Inspektoratit të Mbrojtjes së Territorit (IMT), Ardian Halili, i cili akuzohet për ndërtim të paligjshëm gjatë kohës që mbante funksion publik. Sipas hetimeve, Halili është kapur duke kryer punime ndërtimi pa leje në një kompleks turistik privat në pronësi të tij, të quajtur “Saint Michelle Residence”, ndërtuar në një sipërfaqe prej 5,600 metrash katrorë në zonën e Ishmit.
Kompleksi përfshin 11 kabina të tipit garsoniere, një godinë dykatëshe, një fushë minifutbolli dhe një pishinë, ndërtime që janë realizuar ndërmjet viteve 2018 dhe 2021, periudhë gjatë së cilës Halili ushtronte detyrën e kryeinspektorit të IMT-së në Bashkinë Durrës. Autoritetet e konsiderojnë këtë rast si një shembull flagrant të abuzimit me detyrën dhe konfliktit të interesit, pasi zyrtari i ngarkuar për ndalimin e ndërtimeve pa leje, ka shkelur vetë ligjin për përfitim personal.
Në një konferencë për shtyp, drejtori i Policisë Vendore të Durrësit, Drejtues i Parë Vilson Bala, deklaroi: “Ky rast është dëshmia më e qartë sesi zyrtarë të shtetit, duke shpërdoruar detyrën shtetërore, kanë abuzuar me qëllim përfitimi, në këtë rast të ndërtimit në kundërshtim me çdo ligj e rregull. Shkelja e syrit, apo bërja palë me abuzuesit, apo më keq akoma, të ndërtosh vetë pa leje kur je në detyrë për të parandaluar këtë vepër penale, do marrë fund njëherë e mirë në qarkun Durrës.”
Sipas tij, arrestimi i Halilit është pjesë e një operacioni më të gjerë për identifikimin dhe ndëshkimin e ndërtimeve pa leje dhe të personave përgjegjës, përfshirë ata që qarkullojnë me armë zjarri apo përbëjnë rrezikshmëri të lartë. Bala u shpreh se koordinimi mes strukturave të Policisë së Shtetit, Policisë Bashkiake, IMT-së dhe IKMT-së ka nisur të japë rezultat, veçanërisht në lirimin e hapësirave publike të zaptuara.
Materialet për këtë çështje janë referuar tashmë në SPAK, dhe Halili do të përballet me akuzat për “Ndërtim të paligjshëm me qëllim përfitimi”, “Korrupsion i zyrtarëve të lartë” dhe “Shpërdorim të detyrës”.
