Banorët e Zall Gjoçajt po zhvillojnë sot një protestë para Gjykatës Administrative të Apelit në Tiranë, pasi ky institucion nuk po merr parasysh ankimimet e tyre. Përmes kësaj proteste të organizuar, banorët kërkojnë që Gjykata ta caktojë sa më shpejt datën e shqyrtimit të çështjeve në Apel, për ndalimin e punimeve për ndërtimin e hidrocentraleve në zonën ku ata banojnë.
Gjykata Administrative e Shkallës së Parë në Tiranë, në nëntor të vitit 2019, e rrëzoi padinë e banorëve të fshatrave Zall Gjoçaj, Gjoçaj dhe Melth në Mat, si dhe disa organizatave të Shoqërisë Civile, që kërkonin pezullimin e punimeve për ndërtimin e hidrocentralit të Sekës në lumin Zall Gjoçaj, deri në marrjen e një vendimi mbi themelin e çështjes.
Gjithashtu, më herët këta banorë të mbështetur edhe nga aktivistë të Shoqërisë Civile, kanë zhvilluar edhe disa protesta të tjera, në mënyrë që të mos ketë ndërtime në Parkun Kombëtar të Zall Gjoçajt. Sipas tyre, ndërtimi i hidrocentraleve është një skemë korruptive në favor të oligarkëve, që do t’i shkaktojë probleme me ujin e pijshëm.
