Misioni i KFOR-it ka reaguar lidhur me paralajmërimin e Qeverisë së Kosovës në detyrë për ndërtimin e dy urave të reja mbi lumin Ibër në Mitrovicë, duke theksuar se kjo çështje nuk hyn në kompetencat e tyre.
Në një përgjigje për mediat, KFOR sqaroi se angazhimi i trupave të tij mbetet i përqendruar te sigurimi i mjedisit dhe ruajtja e rendit, pa ndërhyrë në projekte ndërtimore të tilla.
“KFOR-i mban një prani fikse në urën kryesore mbi lumin Ibër dhe kryen patrullime të rregullta në zonat përreth për të garantuar një ambient të sigurt,” thuhet në deklaratë.
Sa i përket veriut të Mitrovicës dhe pjesëve të tjera të Kosovës, KFOR theksoi se do të vijojë të ketë një prani të dukshme dhe fleksibile në terren, e gatshme për t’iu përgjigjur çdo zhvillimi që mund të ndikojë në sigurinë e përgjithshme.
“KFOR-i vazhdon të zbatojë mandatin e tij, të bazuar në Rezolutën 1244 të Këshillit të Sigurimit të OKB-së, për të garantuar një mjedis të sigurt për të gjithë qytetarët e Kosovës dhe për të mundësuar lirinë e lëvizjes,” përfundon deklarata.
