Kryepeshkopi i Tiranës, Durrësit dhe i gjithë Shqipërisë, Anastas Janullatos, ndërroi jetë në moshën 95-vjeçare në spitalin “Evangelismos” të Athinës. Ndarja nga jeta erdhi si pasojë e mosfunksionimit të shumë organeve, më 25 janar 2025, rreth orës 08:30 të mëngjesit.
Lajmi u konfirmua nga Kisha Orthodhokse Autoqefale e Shqipërisë, e cila njoftoi se Kryepeshkopi ishte shtruar fillimisht në Tiranë më 31 dhjetor, për t’u transferuar më pas në Athinë për shkak të një gjakderdhjeje në sistemin e aparatit tretës.
Janullatos lindi në Pire të Greqisë më 4 nëntor 1929. Ai mbërriti për herë të parë në Shqipëri më 16 korrik 1991, ku u prit nga një grup besimtarësh orthodhoksë dhe klerikë të besimeve të tjera. U fronëzua në krye të Kishës Ortodokse Autoqefale Shqiptare më 2 gusht 1992, duke shërbyer për 33 vite në këtë pozicion.
Nën drejtimin e tij, Kisha Orthodhokse Autoqefale e Shqipërisë u ringjall plotësisht pas periudhës së regjimit ateist. U riorganizuan më shumë se 400 famulli, u ndërtuan 155 kisha të reja dhe u restauruan rreth 200 të tjera. Themeloi Akademinë Theologjike “Ngjallja e Krishtit” në Durrës dhe dy lice kishtare, duke formuar 159 klerikë të rinj.
Vepra më madhështore e Janullatosit mbetet Katedralja “Ngjallja e Krishtit” në Tiranë, kisha e tretë më e madhe ortodokse në Evropë, e inauguruar më 24 qershor 2012. Ai kontribuoi gjithashtu në zbutjen e tensioneve politike midis Shqipërisë dhe Greqisë, duke u bërë urë lidhëse mes dy vendeve.
Në vitin 2000, Janullatos u propozua për Çmimin Nobel të Paqes nga Akademia e Athinës dhe personalitete të ndryshme shqiptare. Gjatë karrierës së tij, ai u nderua me 27 medalje dhe çmime ndërkombëtare. Në 2017, ai mori shtetësinë shqiptare, duke vulosur përfundimisht lidhjen e tij me vendin.
Trupi i Kryepeshkopit do të transferohet në Tiranë, ndërsa detajet e ceremonisë mortore do të vendosen pas mbledhjes së Sinodit. Pritet pjesëmarrja e përfaqësuesve të lartë fetarë botërorë dhe mediave ndërkombëtare.
