Ish-deputetja socialiste Edlira Bode është emëruar drejtoreshë e Spitalit të Traumës në Tiranë, duke zëvendësuar në këtë post Arben Zebelin, i cili e drejtonte spitalin që nga viti 2017.
Edlira Bode ka mbajtur mandatin e Deputetes në Kuvendin e Shqipërisë për Qarkun e Korçës gjatë viteve 2017-2021, si anëtare e Komisionit për Punën, Çështjet Sociale dhe Shëndetësinë. Gjatë kësaj periudhe ajo ka qenë mbështetëse dhe promovuese e një sërë ligjesh të lidhura me shëndetin, profesionet mjekësore dhe mbrojtjen sociale.
Bode ka kryer studimet e larta në Fakultetin e Mjekësisë të Universitetit të Tiranës dhe ato pasuniversitare në otorinolaringologji në Universitetin e Genova-s, Itali. Ajo ka marrë titullin Mjeke Specialiste Otorinolaringologe. Ndër të tjera, Bode ka shërbyer, për disa vite, si Mjeke e Përgjithshme dhe e Familjes pranë Shërbimit Shëndetësor Parësor në qytetin e Bilishtit dhe në disa qendra shëndetësore të Rrethit të Devollit. Gjatë viteve 2008-2016 ajo ka punuar si Mjeke Specialiste Otorinolaringologe në Spitalin Rajonal të Korçës. Gjatë viteve 2015-2016 Edlira Bode ka drejtuar Urdhrin e Mjekëve në Qarkun e Korçës.
Ajo iu bashkua mjekëve në luftën ndaj pandemisë, duke iu përgjigjur thirrjes për të kontribuar në systemin spitalor, gjë për të cilën ka thënë se ishte më e pakta që mund të bënte.
