Në spitalin Rajonal të Shkodrës sot i jepet lamtumira e fundit kirurges së njohur të qytetit Zyliha Kraja, e cila u nda nga jeta ditën e djeshme, pasi ishte e infektuar me Covid-19.
Kolegët e saj u mblodhën me lot në sy në hyrjen e spitalit për të thënë fjalët e fundit për kolegen e palodhur, dhe besnike të profesionit që i shërbeu deri në ditën e fundit profesionit.
Kjo detyrë e vështirë iu ngarkua mjekut kirurg Shpëtim Ymeri, i cili as vetë nuk e kishte menduar që do i binte “kjo barrë e madhe”.
“Nuk e mendoja kurrë që të më vije në këtë barrë që të flisja në këtë ceremoni mortore, mendoja që do të shtrëngoja dorën siç bëja në spital dhe të thoja “ia hodhe mikja ime”. Nuk mundëm të të shpëtonim pavarësisht përpjekjeve tona maksimale. Humbje e madhe për familjen, e mbarë qytetin. Ndihemi të pikëlluar për këtë humbje, të një profesioniste të vwrtetw, dokroreshë humane, të palodhur dhe fjalë pak dhe besnike të këtij profesioni që qëndroi deri në ditën e fundit. Burim frymëzimi, ne të jemi mirënjohës. Kemi kaluar momente stresi, lidhje e sakrifica por edhe sadisfaksionin që të të jep profesioni si kirurg. Njerëzit si ti nuk vdesin kurrë, por jetojnë në mendjen dhe zemrat tona”, tha mjeku Ymeri.
Kujtojmë se kirurgia e njohur shkodrane Zyliha Kraja, 78-vjeçe, ishte bashkëshortja e dramaturgut të njohur Fadil Kraja. Kraja u nda nga jeta pasi ishte infektuar prej ditësh me Covid-19.
Mjekia kirurge Kraja prej vitesh kishte dalë në pension por sërish kishte vijuar të kontribuojë në spitalin e Shkodrës.Para se të infektohej me virusin vdekjeprurës gjendja shëndetësore e mjekes ishte e mirë, por ditët e fundit u përkeqësua.
