Dita e sotme nisi me një lajm të keq. Ish-kryeministri i Shqipërisë, Bashkim Fino, u nda nga jeta. Të menjëhershme erdhën reagimet e politikanëve shqiptarë, që i shprehin ngushëllimet e tyre familjes të së ndjerit. Fino ishte i prekur nga “Covid-19” dhe vuante edhe nga një sëmundje bashkëshoqëruese
Nëpërmjet një mesazhi në rrjetet sociale, kryeministri aktual i vendit, Edi Rama shpreh ngushëllimet për familjen. Ndër të tjera, kreu i qeverisë ka njoftuar se ditën e sotme do të ndalen të gjitha aktivitet elektorale për zgjedhjet e 25 prillit.
“E pabesueshme, po shumë fatkeqësisht e vërtetë, miku im, miku ynë i mirë Bashkim Fino nuk jeton më! Nuk kam fjalë. Sot për familjen tonë të madhe është një ditë zie, aktivitetet tona elektorale do të ndalen në nderim e kujtim të vëllait tonë të dashur”, -ka shkruar kryeministri Edi Rama.
Me anë të një fotoje në rrjetet sociale, ka reaguar edhe ish-ministrja Mimi Kodheli. Në regimin e bërë, Kodheli kujton kohën që kanë qenë shokë klase në fakultet.
“Ja ku jemi të dy, shokë të një klase fakulteti. Mbetëm deri sot të tillë, por jam e sigurt do takohemi sërish. Lamtumirë shok i kohërave të vjetra e moderne, mik i ditëve të mira e të vështira, Bashkim Fino. Do na mungosh të gjithëve, por më shumë Dianës së dashur. Lamtumirë e shihemi në kohë më të mira”, ka shkruar Mimi Kodheli.
