Kur jemi në orët e fundit para zgjedhjeve të 25 prillit, shumë ngjarje kanë ndodhur gjatë muajit të fundit. Makinat me shpërndarje parash për blerje votash, kanë qenë të shumta. Policia në Korçë, ka proceduar penalisht tre simpatizantë të Partisë Demokratike për rastin e automjeteve të ndaluara në fshatin Podgorie.
Më herët gjatë ditës së sotme, drejtuesi politik i PD-së në Korçë, Edmond Spaho, denoncoi se struktura për mbrojtjen e votës ndaloi tre automjete të njësisë administrative Vreshtas, me rreth shtatë punonjës të kësaj njësie në to.
Lidhur me rastin, policia ka nisur procedim penal në gjendje të lirë për 25-vjeçarin F. D., 25 E. D., 21 vjeç dhe A. G., 54 vjeç, banues në fshatin Podgorie, Maliq. Sipas policisë, ata i kanë bllokuar rrugën në Maliq, Cezar Bezatit, administratorit të Njësisë Administrative Vreshtas, Maliq, me pretendimin se në automjet kishte lekë për të blerë vota.
Nga verifikimet e kryera dhe kontrolli i ushtruar nga ana e grupit hetimor dhe shërbimeve të policisë, vijon policia, në automjetin e Bezatit nuk u gjet asnjë send kompromentues, në lidhje me procesin zgjedhor. Sipas PD, në automjetin e Bezatit, u gjendën:
-Lista e zgjedhësve të fshatit Podgorie
-Listë e patronazhit të fshatit Podgorie, me patronazhist administratorin Çezar Bezati,
Liste e shkruar me dore me emra të banorëve, të cilën, sipas PD, policia refuzoi ta bëjë publike.
