Ditën e sotme është ndaluar edhe shtetasja 55-vjeçare, Dhurata Lazaj, në kuadër të arrestimeve që po ndodhin në ARRSH Durrës, për një karburant të ndërtuar në kundërshtim me ligjin.
Zyrtarja e ARRSH, me detyrë inxhiniere, akuzohet për Shpërdorim detyre, dhe i është caktuar masa e sigurisë ‘Arrest me burg’.
Në total, tashmë ka shkuar në 8 numri i zyrtarëve të arrestuar, të përfshirë në skemën e favorizimit për biznesmenin Mustafa Koka, për devijimin e barrierës së rrugës nacionale, që makinat të kishin mundësi të futeshin në karburantin e tij.
Ende në kërkim është biznesmeni Mustafa Koka, që nuk është arritur të gjendet ende nga policia.
NJOFTIMI I PLOTË I POLICISË:
Specialistët për Hetimin e Krimit Ekonomik dhe Financiar në DVP Durrës, në vijim të operacionit të koduar “BYE PASS”, kanë ndaluar shtetasen Dh. L., 55 vjeçe, banuese në Tiranë, pasi Gjykata e Shkallës së Parë Durrës i ka caktuar masën e sigurisë “Arrest në burg”, për veprën penale “Shpërdorim detyre”. Materialet i kaluan Prokurorisë së Rrethit Gjyqësor Durrës, për veprime të mëtejshme.
Një karburant në aksin rrugor “Plepa-Kavajë” ka sjellë prangosjen e zyrtarëve të Autoritetit Rrugor Shqiptar në Durrës. Prokuroria e Durrësit ka zbuluar detaje nga hetimet duke bërë me dije se gjithçka ka nisur nga aksidentet që ndodhnin në kilometrin 3 të aksit nacional, zonë ku edhe ndodhet pika e karburantit.
/GazetaReforma.com/
