Është ndarë nga jeta në moshën 66-vjeçare shkrimtarja dhe gazetarja Vera Isaku, pasi vuante prej kohësh nga një sëmundje e pashërueshme.
Ajo lindi në Bilisht, ku kaloi fëmijërinë dhe rininë e hershme e më pas studio për letërsi në Universitetin e Tiranës.
Në përfundim të studimeve universitare, ajo jetoi dhe punoi për një kohë të gjatë në Lezhë së bashku me bashkëshortin Agim Isaku. Me ardhjen e demokracisë në vend, ajo u bashkua me shtypin opozitar, duke u bërë kështu gazetarja e parë femër në gazetën Rilindja Demokratike. Ndër të tjera, Isaku ka qenë edhe drejtuese e Radio-Televizionit Shqiptar dhe drejtore e Qendrës Ndërkombëtare të Kulturës.
Vera Isaku la pas gjithashtu një numër të madh shkrimesh publicistike sin ë shtypin vendas, ashtu edhe në atë të huaj. Ajo mban autorësinë e një sërë librash që i përkasin zhanreve të ndryshme, që nga romani, tregimi, poezia dhe eseistika. Ndër librat që ajo ka botuar janë edhe “Fate Tullace”, “Në Biarritz rri fati”, Shqipëtarët nuk e njohin grinë: publicistike etj. Vitet e fundit ajo iu kushtua edhe pikturës dhe në vitin 2015 hapi një ekspozitë të sukseshme me 30 punime. Ceremonia e përcjellses për në banesën e fundit do të jetë private me pjesëmarrjen e rrethit të ngushtë familjar, sipas dëshirës së vetë të ndjerës.
