Një ngjarje tragjike ka tronditur sot botën e medias shqiptare. Gazetari dhe analisti i njohur Artur Zheji ka ndërruar jetë papritur në moshën 64-vjeçare, pas një arresti kardiak, ndërsa ndodhej me familjen për pushime në Sarandë.
Ngjarja ka ndodhur pasditen e së shtunës në një restorant përgjatë rrugës “Butrinti”, ku Zheji po drekuar me bashkëshorten dhe djalin. Sipas informacioneve paraprake, ai është ndjerë keq papritur në tavolinë dhe ka humbur ndjenjat. Të pranishmit kanë njoftuar menjëherë urgjencën, ndërsa ai është transportuar drejt spitalit rajonal “Petro Nako”.
Pavarësisht përpjekjeve të mjekëve, Zheji ka mbërritur pa shenja jete dhe është konstatuar i vdekur pak minuta më vonë.
Vdekja e tij ka sjellë trishtim të thellë për familjen, të afërmit dhe ata që ndodheshin pranë në momentin e ngjarjes. Pamundësia për t’i shpëtuar jetën ka bërë që situata në spital të jetë mjaft e rëndë emocionalisht për familjarët.
Artur Zheji kishte qenë aktiv në media dhe në jetën publike për dekada me radhë. Humbja e tij e papritur ka lënë pas dhimbje dhe tronditje.
