Dr. Mihallaq Prifti, një nga emrat më të njohura të mjekësisë shqiptare, ka ndërruar jetë këtë të enjte në moshën 91-vjeçare.
I njohur si “Misha i Madh”, ai ka dhënë një kontribut të jashtëzakonshëm në fushën e Shërbimit të Anestezisë dhe Reanimacionit në Shqipëri.
Lindur në Nartë të Vlorës, Dr. Prifti ka qenë një pionier në këtë fushë, duke u specializuar në Shën Petërsburg në vitin 1958. Pas kthimit, ai ka punuar për shumë vite në Spitalin Ushtarak, ku dhe u bë shefi i parë i Shërbimit të Anestezisë.
Ai u njoh për përkushtimin dhe profesionalizmin e tij, duke qenë një figurë shumë e dashur për kolegët dhe pacientët.
Edhe pas daljes në pension, Dr. Prifti ka vazhduar të kontribuonte për shumë vite, duke mbetur një mentor dhe udhërrëfyes për brezat e rinj të mjekëve.
Shoqata e Anestezistëve dhe Reanimatorëve të Shqipërisë ka shprehur ngushëllime të sinqerta për humbjen e Dr. Priftit, duke theksuar se ai do të mbetet gjithmonë një figurë e paharruar dhe një shembull përkushtimi dhe profesionalizmi në mjekësi.
Në një postim në rrjetet sociale, Shoqata ka shkruar:
“Sot, në moshën 91-vjeçare, humbëm anestezistin më të vjetër të Shërbimit të Anestezi-Reanimacionit, Dr. Mihallaq Prifti, i njohur nga të gjithë si ‘Misha i Madh’. Ai ka dhënë një kontribut të jashtëzakonshëm gjatë periudhës më të vështirë të këtij shërbimi, me një angazhim dhe profesionalizëm të paepur. Shoqata e Anestezistëve dhe Reanimatorëve të Shqipërisë shpreh mirënjohjen dhe ngushëllimet më të sinqerta për familjen, kolegët dhe miqtë.”
