Trajneri i Shqipërisë, Sylvinho, doli në konferencë për shtyp para ndeshjes vendimtare të Nations League kundër Ukrainës, e cila është programuar për të martën mbrëma. Sylvinho shprehu optimizëm për mundësinë e mbylljes së këtij cikli në mënyrën më të mirë të mundshme.
“Respektojmë Ukrainën, por ne futemi në fushë për fitore. Ky është grupi ku çdo gjë mund të ndodhë, edhe pse është ndeshja e fundit. Katër skuadrat kanë mundësinë të shkojnë në Euro 2024. Ne e kemi përgatitur ndeshjen për të fituar. Nuk futemi për barazim. Jemi të avantazhuar, pasi luajmë në shtëpi,” tha trajneri i Shqipërisë.
Ai shtoi se ndeshja e dytë është gjithmonë më e vështirë për shkak të periudhës së shkurtër përgatitore dhe nevojës për rikuperim pas ndeshjeve.
“Ka pak ditë për t’u përgatitur. Sot kemi një stërvitje, nesër do të shohim se si janë rikuperuar lojtarët. Duhet të kuptojmë situatën dhe të marrim vendimet në bazë të gjendjes fizike,” u shpreh Sylvinho.
Ai gjithashtu theksoi se vendimet për lojtarët si Tuci dhe Asani do të merren pas vlerësimeve të fundit.
Sa i përket formacionit, trajneri shpjegoi se do të kërkojnë ekuilibër në sulm.
“Uzuni është më shumë një sulmues i dytë, i fortë dhe i shfrytëzon hapësirat, por duhet të gjejmë ekuilibër. Nuk preferoj të luaj me dy sulmues qëndror,” tha ai, duke theksuar rëndësinë e përshtatjes me tipologjinë e kundërshtarit.
Në përfundim, Sylvinho e quajti këtë ndeshje një finale për ekipin: “Ky është një nga grupet më të balancuara. E kam parë Ukrainën duke luajtur kundër Gjeorgjisë dhe ka pasur ekuilibër. Grupi është i fortë, por ne do të bëjmë gjithçka për të fituar dhe do të japim maksimumin.”
