30 shtatori shënon ditën e tretë të grevës së urisë për naftëtarët në qytetin e Ballshit. Një prej pjesëtarëve të grevës, shprehet për mediat se megjithëse greva vazhdon, askush nuk po i dëgjon kërkesat e tyre, dhe nuk kanë marrë asnjë përgjigje.
Sipas tyre, dy kërkesat që ata kanë, marrjen e pagave të prapambetura dhe rifillimin e punës në uzinë, i duan që të plotësohen 100%, përndryshe ata nuk dalin nga greva e urisë.
“Në momentin që ne po flasim, gjendja jonë shëndetësore është e qëndrueshme. Vendi ku jemi akomoduar ka pak lagështirë dhe nuk i kemi kushtet e nevojshme. Nuk kemi pasur asnjë komunikatë nga institucionet shtetërore. Jemi 10 veta. Në grevë ky është një numër simbolik. Në grevë është i gjithë qyteti i Ballshit. Ne kërkojmë plotësimin 100 përqind të kërkesave tona” – tha një prej naftëtarëve për mediat.
Naftëtarët e Ballshit kanë disa muaj që protestojnë për të marrë pagat e tyre, por zëri i tyre nuk është dëgjuar dhe kështu morën aktin ekstrem. Pas mbylljes së rafinerisë që administrohet nga “Tosk Energji”, janë më shumë se 800 punëtorë që kanë mbetur pa punë. Disa ditë më parë ata protestuan edhe para ministrisë së Infrastrukturës dhe Energjisë, dhe kërkuan takim me ministren Balluku, por kjo e fundit nuk i priti në zyrë.
/GazetaReforma.com/
