Parku Kombëtar i Vjosës, simboli natyror i Shqipërisë dhe lumi i fundit i egër në Evropë, ndodhet përballë një rreziku të madh mjedisor. Organizata “Blue Heart Rivers” ka denoncuar publikisht ndotjen e rëndë nga derdhjet e naftës në ujërat e lumit, që sipas tyre po vjen nga impiante asfaltimi dhe përpunimi nafte pranë kufijve të parkut.
Ulrich Eichelmann, drejtues i projektit ndërkombëtar “Zemra Blu”, e ka cilësuar situatën si “shembulli më i keq i shkatërrimit të lumit” që ka parë ndonjëherë. Ai theksoi se derdhjet e naftës përbëjnë jo vetëm ndotje të rëndë, por edhe një shkelje të drejtpërdrejtë të standardeve që duhen respektuar në një Park Kombëtar të mbrojtur.
“Vetëm disa litra naftë mund të ndotin mijëra litra ujë, dhe ajo që rrjedh këtu është shumë më tepër,” paralajmëroi ai, duke shtuar se pasojat për habitatet dhe jetën e egër mund të jenë shkatërruese.
Pamjet e publikuara nga “Blue Heart Rivers” në rrjete sociale tregojnë zona të mbuluara me naftë dhe mbetje industriale, në një mjedis që duhej të ishte i paprekur. Në reagimin e tyre, ata i bëjnë thirrje autoriteteve shqiptare që të ndërhyjnë menjëherë, të pastrojnë zonën dhe të mbyllin impiantet ndotëse.
Denoncimi vjen vetëm pak ditë pasi ministrja e Turizmit dhe Mjedisit, Mirela Kumbaro, njoftoi se Vjosa pritet të përfshihet në listën e UNESCO-s si “Rezervat i Biosferës”, pjesë e programit ndërkombëtar “Njeriu dhe biosfera”. Por skandali i fundit mund të rrezikojë rëndë marrjen e këtij statusi të shumëpritur.
Përmes një postimi, organizata shtron pyetjen: “Derdhje nafte në pragun e Parkut Kombëtar të Vjosës. A është kjo pamja e mbrojtur?”, ndërsa kritikon qeverinë shqiptare për veprime të pamjaftueshme për mbrojtjen reale të parkut.
“Përcaktimi i Parlamentit Kombëtar duhet të nënkuptojë veprim, jo vetëm një titull”, shkruan “Blue Heart Rivers”, duke shtuar: “Ta mbajmë Vjosën të egër, jo të mbuluar nga nafta.”
Situata kërkon përgjigje të shpejtë nga institucionet, për të shmangur jo vetëm një katastrofë mjedisore, por edhe humbjen e një statusi ndërkombëtar që do ta poziciononte Shqipërinë si një shembull në ruajtjen e natyrës së egër në Evropë.
