Situata para Bashkisë së Durrësit u përshkallëzua në tensione të forta dhe përplasje verbale, teksa banorë të lagjeve numër 7 dhe 8 protestuan ashpër kundër shpronësimeve që do të kryhen në kuadër të projektit infrastrukturor “Lidhja e Currilave” me rrugën “Aleksandër Goga”.
Protesta u zhvillua pak para mbledhjes së Këshillit Bashkiak, e planifikuar në orën 12:00, ku një nga pikat kryesore të rendit të ditës ishte miratimi i shpronësimeve të banesave që do të shemben për ndërtimin e unazës. Banorët, të revoltuar, u përplasën me zyrtarë dhe anëtarë të Këshillit Bashkiak, duke kërkuar llogari për vendimin që prek drejtpërdrejt shtëpitë e tyre.
Gjatë përplasjeve, situata degradoi në fyerje të rënda. “O bthë qrë, o krvë e mtit. O lëngaraq, nuk do dalësh më ti? O të qfsha ropt, të qfsha motrën”, i është drejtuar një prej protestuesve një zyrtari të bashkisë, në sy të qytetarëve dhe mediave.
Tensionet vijuan edhe në hyrje të Bashkisë, ku banorët u përballën me bllokadën e policisë bashkiake. “Ti ke firmosur për ne, mos guxo të futesh në mbledhje. Ikni nga mbledhja. Turip, turp. Mos e lini legenin, ne po na prishin shtëpinë”, i tha një qytetar një anëtari të Këshillit Bashkiak, teksa ky i fundit po hynte në sallën e mbledhjes.
Nga sheshi përpara Bashkisë, thirrjet u drejtuan edhe ndaj kryebashkiakes Emiriana Sako, të cilës banorët i kërkuan të dilte dhe t’u hapte derën për të marrë pjesë në mbledhje. “Emiriana Sako hap derën, o hajdute”, dëgjohen të thonë qytetarët, duke e akuzuar drejtpërdrejt për vendimin e marrë.
Në prononcimet për mediat, banorët deklaruan se nuk janë njoftuar më parë për prishjen e banesave dhe se kundërshtojnë fort vlerën e shpronësimit. Sipas tyre, shuma e parashikuar nuk mjafton për të blerë një banesë të re, duke i lënë ata pa zgjidhje dhe pa strehë. Ata kërkojnë nga bashkia që fillimisht t’u sigurohet një shtëpi, përpara se të shemben banesat aktuale.
Nga ana e saj, Bashkia e Durrësit bën me dije se në parim është miratuar vlera financiare e shpronësimit prej 867.776.164 lekësh për pasuritë pronë private që preken nga ky investim publik. Sipas të dhënave zyrtare, janë evidentuar 131 pronarë, privatë dhe shtetërorë, për të cilët është caktuar vlera e shpronësimit.
