Mbyllja e fasonerive u ka shkaktuar probleme të mëdha ekonomike shumë familjeve.
Punonjëset e një biznesi fason në qytetin e Përmetit janë ngritur ditën e sotme në protestë.
Ata akuzojnë administratorin e firmës se u ka mohuar pagën e luftës.
Fasoneria është mbyllur që më 12 mars, por administratori u ka thënë se nuk përfitojnë asgjë.
Nisur nga kjo situata, punëtorët kanë bërë denoncim në polici.
“Ne kërkojmë pagën e luftës, 40 mijë lekë të reja. Administratori thotë nuk ju takon, se jeni në sistem, por ne prej 12 marsit jemi shkëputur nga puna. Kur dëgjuam lajmin nga kryeministri, Tatimet në Përmet na thanë se u takon. Kontaktuam me administratorin, ai thotë nuk ju takon. Bashkia tha do të bëj të pamundurën, nuk po zgjidhej asgjë, u drejtuam te policia, atje kaloi në çështje të tjera”, tha njëra nga punonjëset për “Report Tv”.
Punëtoret shprehen se nuk do të fillojnë punën nëse nuk marrin pagën e luftës.
“Jemi disa gra, dhe puna jonë është shkëputur që prej 12 marsit. Administratorin e kontaktuam dhe na thotë nuk ju takon, se jeni në sistem, s’ju kemi hequr nga sistemi. Kemi vajtur në Bashki, bashkia na thotë do mundohemi ne. Te tatimet na thanë “po ju takojnë”. Pasi kishin folur me administratorin na thanë “jeni me pikëpyetje”, se ai nuk do të na bëjë dokumentet, kemi shkuar në polici dhe ata e kanë çuar”, thanë punëtoret.
E njëjta problematikë është hasur edhe në Korçë e Durrës.
Administratorët e fasonerive nuk kanë bërë transparencë me punëtorët përsa i përket pagës së luftës, duke i lënë në mëshirë të fatit.
Sindikatat e fasonerive ndërkohe vijojnë të heshtin përballë kësaj nëpërkëmbje që po u bëhet punëtorëve.
