Gjykata e Posaçme ka vendosur masën e sigurisë “arrest me burg” për inspektorin e IMT-së së Tiranës, Gerald Fuçia, i akuzuar për korrupsion pasiv në lidhje me një tendë të vendosur pa leje në zonën e Kombinatit. Vendimi u mor nga gjyqtarja Etleva Deda, pas kërkesës së prokurorit të SPAK, Sotir Kllapi.
Në seancën me dyer të mbyllura, Fuçia mohoi çdo përfshirje në ngjarje. “Nuk e njoh fare qytetarin, as e kam kontaktuar, as takuar, as nuk di gjë për ryshfetin. Deklaroj me përgjegjësi morale dhe ligjore se nuk kam lidhje me këtë histori. E ushtroj detyrën me seriozitet dhe profesionalizëm, si në dhjetëra raste të tjera të aksionit për lirimin e hapësirave publike”, deklaroi ai para gjykatës.
Avokatët e tij kërkuan një masë më të butë sigurie, duke argumentuar se duhen sqaruar rrethanat e plota të çështjes. Ndërkohë, për të njëjtin rast është vetëdorëzuar në Policinë e Tiranës edhe inspektori tjetër i IMT-së, Klajdi Zhilla, i cili ishte shpallur në kërkim. Ai u paraqit i shoqëruar nga avokati, duke pretenduar se nuk kishte dijeni për shpalljen në kërkim dhe se këtë e kishte mësuar nga mediat.
Dy inspektorët akuzohen se i kanë kërkuar një qytetari shumën prej 1 mijë eurosh për të mos i prishur tendën e lokalit. Hetimet për këtë rast nisën nga Policia e Tiranës dhe më pas u referuan në SPAK, pas kallëzimit të pronarit të lokalit.
Akuza që rëndon mbi ish-punonjësit e IMT-së është ajo e korrupsionit pasiv, ndërsa seanca për masën e sigurisë ndaj Klajdi Zhillës pritet të zhvillohet në ditët në vijim.
