Një ngjarje e rëndë është regjistruar më 29 prill në Tiranë, ku pesë persona kanë rrëmbyer një 68-vjeçar dhe kanë kërcënuar bashkëshorten e tij për të marrë një shumë të konsiderueshme parash në këmbim të lirimit.
Ngjarja ka ndodhur në rrugën “George W. Bush”, ku viktima u mor me forcë dhe u dërgua në një banesë të braktisur në fshatin Kakunjë.
Autorët më pas kanë kontaktuar bashkëshorten e të moshuarit, duke i kërkuar 2 milionë lekë për ta lënë të lirë.
E tmerruar, gruaja ka dorëzuar rreth 1.7 milionë lekë në zonën e Saukut, ku shuma iu dorëzua njërit prej të dyshuarve.
Menjëherë pas sinjalizimit dhe falë ndërhyrjes së shpejtë të Policisë së Tiranës, u organizua operacioni i koduar “Imediat”, në kuadër të të cilit u arrestuan pesë persona, Sulejman Sina, 31 vjeç, Klinton Sina, 21 vjeç (vëllezër), Idajet Mashollari, 21 vjeç, Bajram Ibraliu, 57 vjeç dhe Nikoleta Begolli, 32 vjeçe – të gjithë banues në Tiranë.
Nga hetimet rezulton se tre prej tyre Sulejmani, Klintoni dhe Idajeti kanë qenë ata që kanë kryer rrëmbimin, ndërsa shuma e parave është marrë nga Bajram Ibraliu.
Nikoleta Begolli dyshohet se ka ndihmuar në transport apo logjistikë. Gjatë kontrolleve në banesat dhe mjetet e përdorura nga autorët, policia gjeti dhe sekuestroi shumën prej 1.746.000 lekësh, të dyshuara si të marra nga viktima përmes shantazhit.
Materialet hetimore janë dorëzuar në Prokurorinë e Tiranës për vijimin e procedurave penale ndaj të ndaluarve, të akuzuar për “Heqje të paligjshme të lirisë” dhe “Shtrëngim me anë të kanosjes për dhënie pasurie”, në bashkëpunim.
