Kushtet ku ruhej mishi i pulës në magazinat e subjektit “KMY” kanë ngritur shqetësime serioze për sigurinë ushqimore, pasi produktet janë konstatuar në ambiente me prani myku dhe ndryshku, duke përbërë rrezik të drejtpërdrejtë për konsumatorët.
Sipas të dhënave, nëse Agjencia Kombëtare e Ushqimit nuk do të kishte ushtruar kontroll në këto ambiente, mishi i kontaminuar mund të kishte përfunduar në treg dhe në tryezat e qytetarëve. Në lidhje me rastin, televizioni “Ora News” i është drejtuar AKU-së me një kërkesë për informacion.
Ky institucion ka bërë me dije se subjekti është gjobitur me 300.000 lekë dhe ndaj tij është marrë masa e bllokimit të pjesshëm të aktivitetit. Gjithashtu, për shkak të ruajtjes së mishit në kushte të papërshtatshme higjieno-sanitare, janë bllokuar në total 738 kg produkt fileto dhe gjoks pule.
Për shkak të ndikimit të drejtpërdrejtë që kjo situatë ka tek konsumatori, “Ora News” i është drejtuar me kërkesë për informacion edhe vetë subjektit “KMY”, duke kërkuar një përgjigje të plotë dhe transparente mbi shkeljet e konstatuara, masat e marra, përgjegjësit dhe nëse aktiviteti është rikthyer në standarde të sigurta.
Megjithatë, “KMY” nuk ka dhënë asnjë reagim, duke zgjedhur të mos përgjigjet për një çështje që lidhet drejtpërdrejt me shëndetin publik. Mungesa e një qëndrimi zyrtar, sipas raportimit, dëmton besimin e qytetarëve dhe shton pasigurinë mbi standardet që ndiqen në treg.
Heshtja e subjektit në një moment kur kërkohet transparencë për sigurinë e produkteve ushqimore që konsumohen, rrit dyshimet mbi mënyrën se si trajtohen këto shkelje.
Ndërkohë, më herët është denoncuar edhe një tjetër rast që lidhet me “KMY”, ku dyshohet për procedura të paqarta në asgjësimin e produkteve të skaduara. Sipas të dhënave, AKM, institucioni që duhet të jetë i pranishëm gjatë asgjësimit të produkteve të hequra nga përdorimi, nuk kishte informacion për destinacionin e 54 ton mish dhe sallam të skaduar të këtij subjekti.
