Instituti i Shëndetit Publik ka hedhur dyshimet se mutacionet e reja të Covid, siç janë ai afrikan dhe britanik, ndodhen dhe në vendin tonë.
Sipas ISHP mendohet të jenë rreth 50 raste aktive, mostrat e të cilave janë dërguar për verifikim jashtë vendit.
“Nga të dhënat dhe vlerësimet epidemiologjike, si dhe nga të dhënat nga rrjeti i laboratorëve COVID-19, mendojmë që variante të reja të COVID-19 mund të jenë prezente në vendin tonë”, thuhet më tej në përgjigjen e ISHP-së.
Sa i përket, kapaciteteve që ka ky institucion në identifikimin e variantit të ri COVID, ISHP shprehet se nuk mund të dallojnë me saktësi llojin e virusit.
“Laboratori i Virologjisë në ISHP përdor reagentë dhe kite diagnostike të metodologjisë së bazuar në teknikën molekulare të ‘Real Time PCR’, e cila tregon nëse kemi të bëjmë ose jo me një variant të ri, por jo me saktësi llojin e variantit”, thuhet nga SIHP.
Prania e mutacioneve të reja u përmend dhe në mbledhjen e djeshme të Komitetit Teknik. Shefja e Departamentit të Sëmundjeve infective, Silva Bino, tha se 50 mostra janë dërguar në Britaninë e Madhe për verifikim, pasi dyshohet se këto raste përkojnë me mutacionet e reja.
Kujtojmë se deri më tani vetëm një rast është bërë zyrtarë për infektimin me variantin britanik të Covid-19. Bëhet fjalë për 22 vjeçaren shqiptare e cila udhetoi nga aeroporti i rinasit në gjermani, ku u bë dhe konstatimi i rastit.
