Pas identifikimit të rastit të parë të murtajës së ruminantëve të vegjël në zonën e Postribës, autoritetet kanë vendosur të karantinojnë të gjithë qarkun e Shkodrës për një periudhë 21-ditore.
Masa është marrë si pjesë e përpjekjeve për të frenuar përhapjen e virusit që po kërcënon blegtorinë në disa zona të vendit.
Drejtori i Autoritetit Kombëtar të Ushqimit në Shkodër, Ramir Haderi, konfirmoi se janë intensifikuar kontrollet në terren nga inspektorët e AKU-së dhe shërbimi veterinar.
“Aktualisht ne jemi në një komunikim të vazhdueshëm me Autoritetin Kombëtar të Veterinarisë, trajtimin kryesor e bën veterinaria, ndërsa sipas informacioneve dhe shkëmbimit të informacionit që kemi ndër institucione, ne mbajmë nën kontroll situatën e mishit që të mos kemi tregtim pa vulën e veterinerit përkatës. Për momentin është në një fazë karantine 21 ditore, monitorimi mbahet nga veterinerët e shërbimit që i mbulon veterinaria, ndërsa veterinerët e AKU-së mbajnë dyqanet e mishit dhe kontrollet në subjektet e tregtimit të mishit”, tha Haderi.
Raste të dyshuara janë evidentuar edhe në qarqet e Dibrës dhe Beratit. Deri tani janë konfirmuar tri vatra aktive dhe raportohen rreth 200 krerë bagëti të ngordhura si pasojë e virusit.
Fermerët në Shkodër janë ankuar për dëmet ekonomike të shkaktuara nga ndalimi i tregtimit të mishit dhe produkteve të bulmetit jashtë qarkut, ndërsa autoritetet u kanë bërë thirrje të zbatojnë masat parandaluese.
Ministria e Bujqësisë dhe strukturat veterinaro-shëndetësore kanë kërkuar nga blegtorët që të kufizojnë lëvizjet e tufave, të përmirësojnë higjienën dhe të raportojnë menjëherë çdo rast të dyshimtë klinik.
Çfarë është murtaja e ruminantëve të vegjël?
Murtaja e ruminantëve të vegjël (PPR – Peste des Petits Ruminants) është një sëmundje virale akute dhe shumë ngjitëse që prek kryesisht delet dhe dhitë. Ajo përhapet përmes kontaktit të drejtpërdrejtë me kafshët e infektuara, sekrecioneve të tyre dhe në kushte të mbyllura edhe përmes ajrit.
Simptomat përfshijnë temperaturë të lartë, sekrecione nga sytë dhe hundët, inflamacion të mukozës së gojës, frymëmarrje të vështirësuar, diarre të rëndë dhe humbje oreksi.
Autoritetet theksojnë se kontrolli i shpërthimeve është jetik për të mbrojtur të ardhurat e mijëra fermerëve.
