Kombëtarja do të zhvillojë këtë muaj ndeshjet e radhës për kualifikueset e Ligës së Kombeve dhe një miqësore me Kosovën që do të luhet të mërkurën në orën 16:00 në “Elbasan Arena”.
Por edhe pse jemi përballë ndeshjeve të rëndësishme Kombëtarja jonë do të zbresë në fushë me shumë mungesa pasi disa prej lojtarëve nuk janë lejuar të udhetojnë për shkak të masave kufizuese që ekipet e tyre kanë marrë për të ndaluar përhapjen e Covid-19, por edhe për shkak të dëmtimeve fizike që lojtarët kanë pësuar.
Në këto kushte, trajnerit Edy Reja i është dashur që të grumbullojë lojtarë të rinj që luajnë në ekipet brenda vendit dhe jashtë. Dy zgjedhjet e fundit të trajnerit italian janë dy lojtarët e Tiranës, Erion Hoxhallari dhe Marsel Ismajlgeci, lojtarë që aktivizohen të dy në krahun e majtë të mbrojtjes.
12 ndeshje me Shqipërinë U21 numëron Hoxhallari, i cili grumbullohet për herë të parë me Kombëtaren e madhe. Kujtojmë që roli i tij natyral është i njëtë, mbrojtës i majtë. Por, sezonin e fundit, Hoxhallari u natyralizua në qendër duke bërë mjaft mirë.
Ndërkohë kjo ftesë është gëzim i madh edhe për 20-vjeçarin Ismajlgeci, i cili luan me Tiranën dhe Kombëtaren U21.
