Dy laborantë dentarë, Basar Lalike dhe Eldian Cepeli kanë nisur punën vullnetare për krijimin e pjesëve që mundësojnë modifikimin e ventilatorëve, që i shërbejnë pacientëve të prekur nga COVID-19.
Eksperimenti i tyre rezultoi me sukses dhe ishte rektori i Universitetit të Mjekësisë dhe njëkohësisht shefi i Task Forcës Covid-19, Arben Gjata ai që e konfirmoi.
“Iconstyle.al” ka mësuar, se Lalike dhe Cepeli kanë nisur punën për prodhimin e pjesë të printuar nëpërmjet teknologjisë 3D.
Ditën e sotme ata kanë bërë instalimin e pajisjeve në një laborator në Tiranë dhe pritet që të prodhojnë 300 tuba, të cilët lejojnë furnizimin me oksigjen të dy pacientëve njëkohësisht.
Mësohet gjithashtu, se do të prodhohen edhe prototipe filtrash, që duke iu bashkangjitur një maske zhytjeje “Decathlon”, arrijnë të mbajnë të sëmurin në jetë, pa qenë nevoja e intubimit.
Kjo metodë është eksperimentuar në zonën e Lombardisë dhe ka rezultuar me sukses.
Fillimisht ishte dr. Alfred Aga ai që pikasi shpikjen, duke u dhënë më pas udhëzimet dy laborantëve, për aplikimin e së njëjtës mtodë edhe në Shqipëri.
Kjo nismë krijon edhe një tjetër lehtësi, pasi personeli që do të asistojë të sëmurët, nuk duhet të jetë domosdoshmërisht i aftë në intubim, procedurë kjo që kryhet nga anestezistët dhe reanimatorët.
Nisma vjen në një kohë kur kurba e koronavirusit është në ngjitje dhe numri i të prekurve ka shkuar në 124.
Ditën e djeshme, Ministrja e Shëndetësisë, Ogerta Manastirliu njoftoi kontratën për blerjen e 54 respiratorëve, ndërsa në fillimet e epidemisë, në burime jo zyrtare thuhej se në Shqipëri kishte 140 respiratorë.
Deri më tani në Shqipëri kanë ndërruar jetë 5 persona nga koronavirusi, ndërsa janë shëruar 10 të tjerë.
