Një ngjarje e jashtëzakonshme ka ndodhur në Bulqizë, ku një 35-vjeçar i shpallur i humbur prej tre ditësh është gjetur i gjallë nga disa fëmijë, në një automjet të përmbysur pranë lumit Zall.
Isa Nurçe, banor i zonës, ishte zhdukur pa asnjë gjurmë, ndërsa familjarët e tij kishin ngritur alarmin për humbjen dhe kishin njoftuar Policinë, pasi ai nuk ishte kthyer në shtëpi dhe nuk u përgjigjej në telefon.
Pas tre ditësh kërkimi, zbulimi i tij ndodhi në mënyrë krejt të papritur. Të premten pasdite, disa fëmijë që po laheshin pranë shtratit të lumit në zonën e Zallit, pranë urës së Çeranecit, vunë re një makinë të aksidentuar. Të shqetësuar, ata njoftuan menjëherë policinë.
Shërbimet policore mbërritën në vendin e ngjarjes rreth orës 18:30 dhe gjetën brenda automjetit të përmbysur në afërsi të rrethrrotullimit të Shupenzës, 35-vjeçarin Isa Nurçe, ende të gjallë, ndonëse në gjendje të rënduar. Ai ishte aksidentuar tre ditë më parë dhe kishte mbetur i bllokuar në mjetin e tij, pranë ujërave të lumit.
I riu u transportua menjëherë për ndihmë mjekësore drejt Spitalit të Traumës në Tiranë, ndërsa familjarët e tij janë njoftuar për gjetjen.
Policia konfirmoi rastin me një njoftim zyrtar:
“Sot, më datë 06.06.2025, rreth orës 18:30, shërbimet e Policisë kanë marrë njoftim se pranë rrethrrotullimit të Shupenzës është gjetur nga disa banorë të zonës një automjet i përmbysur pranë lumit. Menjëherë, shërbimet e Policisë kanë shkuar në vendngjarje dhe, nga verifikimet, është identifikuar drejtuesi i automjetit, shtetasi I.N., 35 vjeç, i cili ditën e djeshme ishte shpallur në kërkim, pasi babai i tij kishte kallëzuar se ishte larguar nga banesa. 35-vjeçari është dërguar për ndihmë mjekësore në Spitalin e Traumës. Grupi hetimor po punon për zbardhjen e rrethanave të këtij rasti.”
Një ngjarje që ka tronditur komunitetin, por që përfundoi me një mrekulli: falë vëmendjes dhe ndërgjegjes së fëmijëve, jeta e një të riu u shpëtua.
