Pas përfundimit të seancës në Komisionin e Posaçëm të Apelimit për rivlerësimin e ish-prokurores Rovena Gashi, ka folur vetë motra e saj, Ema Gashi, së cilës iu mohua kërkesa për të qenë ndihmësja ligjore e së motrës.
Teksa ka folur për mediat, Ema Gashi është shprehur se KPA i ka mohuar të drejtën që i njeh ligji.
“KPA kufizoi të drejtën e subjektit për ndihmës ligjor. Sipas ligjit, ndihmës i subjektit mund të jetë kushdo.”-u shpreh ajo.
Në seancën e sotme, anëtarët e Komisionit i sugjeruan Rovena Gashit të zgjedhë një avokat nëse e sheh të arsyeshme, ndërkohë që seanca për rivlerësimin e saj është shtyrë për në datën 23 prill.
Rovena Gashi u shkarkua nga detyra në korrik të 2018-ës pasi nuk kaloi procesin e Vetting-ut.
Në deklarimet e saj u gjetën pasaktësi në lidhje me pasuritë, çka çoi në shkarkimin e saj.
Për këtë çështje, Gashi i është drejtuar gjykatës së Strasburgut, pasi e ka quajtur vendimin si të paragjykuar.
