Presidenti Ilir Meta ka vendosur të mos dekretojë emërimin e Skënder Gjinushit në kreye të Akademisë së Shkencave.
Meta është shprehur se refuzimi i tij lidhet me faktin se gjatë zgjedhjeve për Akademinë e Shkencave, Skënder Gjinushi figuronte ende kryetar i Partisë Social Demokrate.
Pas dekretit për refuzimin e Gjinushit në krye të Akademisë së Shkencave ka reaguar edhe gazetari Mentor Kikia.
Nëpërmjet një postimi në rrjetin social Facebook, ai është shprehur se ky është një refuzim dinjitoz nga ana e presidentit Meta.
Madje gazetari Kikia, ka vazhduar më tej duke thënë se ky do të ishte një turp për Akademinë e Shkencave, por edhe për të gjithë shoqërinë.
“Një refuzim dinjitoz i presidentit Ilir Meta. Presidenti Ilir Meta nuk e dekreton Skënder Gjinushin si Kryetar të Akademisë së Shkencave.
Pavarësisht arsyeve që ka apo që mund të ketë, ky është një veprim i drejtë. Zgjedhja e një politikani karriere, ndërsa kishte ende emrin në KQZ si pjesëmarrës në zgjedhjet vendore, është një turp për Akademinë e Shkencave, një turp për botën akademike në tërësi dhe një turp për të gjithë shoqërinë.
Akademia e Shkencave nuk është ministri, ku titullari është post politik. Kreu i Akademisë së Shkencave duhet të jetë një figurë elitare e shoqërisë, duhet të personifikojë jo vetëm studiuesin dhe akademikun, por edhe personalitetin e padiskutueshëm publik”, shkruan Mentor Kikia.
