Ditën e sotme ka vazhduar diskutimi mbi Projektbuxhetin e vitit 2023 në Komisionin e Punës, Çështjeve Sociale dhe Shëndetësisë. Ministrja e Rinisë, Bora Muzhaqi ka pasur një përplasje me Grida Dumën, teksa gjatë raportimit vuri theksin tek pjesa e buxhetit që prek rininë. Teksa po deklaronte se sektori që ajo mbulon përfshihet edhe në sektorë të ministrive të tjera, Grida Duma nuk mundi që të mos reagonte.
Duma ka përmendur largimet masive të të rinjve jashtë vendit në 5 vitet e fundit, dhe pyet Muzhaqin se si po adresohet nga qeveria ky problem. Po ashtu e ka ‘këshilluar’ ministen e Rinisë që të mos ngatërrohet në çështje që nuk i zotëron dot.
Pjesë nga diskutimi:
Grida Duma: Më shumë se 40 mijë të rinj i mungojnë Shqipërisë për pesë vjet. Si e adresoni ju këtë problem për rininë. Kjo është çështja që u ngrit. Rinia po e lë këtë vend. Është ulur lindshmëria dhe kanë ikur të rinjtë, ju si e adresoni këtë problem.
Bora Muzhaqi: Masat që kemi parashikuar fillojnë tek forcimi i mekanizmave në nivel qendror dhe vendor për të garantuar pjesëmarrjen e të rinjve dhe të rejave. Kemi kërkuar një konsultime me organizata rinore, sa i përket ligjit të vullnetarizmit dhe jemi në pritje nga ky Komision.
Grida Duma: Si thatë?
Muzhaqi: Po e përsëris për ta rikujtuar
Grida Duma: Jo jua kemi rikujtuar ne
Muzhaqi: Por nuk na ktheni përgjigje
Grida Duma: Sepse nuk jemi ministri me portofol , Ju prisni si Ministri që ky Komisioni t’ju takojë ju me grupet e biznesit? Procesin e dëgjesës e kemi bërë dy herë. Si ministre e Shtetit keni punë të vështirë sepse nuk jeni dot ekzekutive. Që i kërkoni këtij Komisioni që juve t’ju marrë grupet e interesit këtu!? Nuk di.
Bora Muzhaqi: Herën e fundit më keni thërritur mua. Ne kemi për detyrë të bëjmë komente
Grida Duma: Ka kaluar koha e komenteve, Ju duhet të ktheni përgjigje këtu. Duhet ta keni të qartë rolin tuaj
Bora Muzhaqi: E kam shumë të qartë.
Grida Duma: Nëse e keni të qartë mos e ngatërroni veten.
Bora Muzhaqi: Unë po përpiqem të shpjegoj.
Grida Duma: Duhet të përpiqesh pak më shumë.
