Partia Socialiste ka fituar bindshëm në zgjedhjet lokale që u zhvilluan një ditë më parë, teksa vazhdon ende procesi i numërimit për disa bashki.
Në një situatë ku Benet Beci, kandidati i Partisë Socialiste për Bashkinë e Shkodrës është 11 mijë vota në avantazh në krahasim me kundërshtarine tij, kryeministri i vendit ka bërë një reagim në rrjetet e tij sociale.
Teksa ka zgjedhur që urimin ta bëjë në dialektin shkodran, Rama ka postuar dhe videon e kandidatit tashmë fitues për Shkodrën, Benet Beci.
“Nadja e mir o Shkodër që krejt zemrën ma ke hangër… I LOVE YOU”, shkruan kryeministri Edi Rama në postimin e tij në rrjetet sociale.
Socialistët kanë arritur që të thyejnë bastionin historik të demokratëve, ndërsa Beci ka marrë rreth 11 mijë vota më shumë se kandidati i koalicionit Bashkë Fitojmë, Bardh Spahia.
PS ka triumfuar në shumicën e bashkive në të gjithë vendin, ndërkohë që Bashkë Fitojmë deri tani është shpallur fituese vetëm në 6 njësi të qeverisjes vendore.
Sipas rezultateve zyrtare nga Komisioni Qendror i Zgjedhjeve, Partia Socialiste ka fituar në 34 bashki, ndërsa kryeson edhe në 20 të tjera mbështetur në numrin e votave të numëruara deri tani. Koalicioni Bashkë Fitojmë ka fituar në 6 bashki, ndërsa një bashki (Finiq) kryesohet deri tani nga kandidati i Partisë Minoriteti Etnik Grek për të Ardhmen (MEGA).
Ndër bashkitë ku tashmë ka përfunduar numërimi i votave, Partia Socialiste ka fituar në Elbasan, Korçë, Vlorë, Verat, Kamëz, Lushnje, Sarandë, Cërrik, Librazhd, Rrogozhinë, Vorë, Peqin, Bulqizë, Mat, Gramsh, Belsh, Roskovec, Tropojë, Dropull, Klos, Kolonjë, Maliq, Delvinë, Skrapar, Patos, Selenicë, Kuçovë, Dimal, Poliçan, Tepelenë, Konispol, Këlcyrë, Libohovë dhe Pustec.
