Ish-zëvendësministrja e Punëve të Brendshme, Rovena Vodo është paraqitur sot në Gjykatën Kundër Korrupsionit dhe Krimit të Organizuar, (GJKKO) ku iu komunikua masa e sigurisë. Vodo ndodhet në masën e “arrestit të shtëpisë” pasi akuzohet për veprën penale “ushtrim ndikimi të paligjshëm”, sepse dyshohet se ka marrë ryshfet për punësimin e dy zonjave në institucione publike.
Sipas SPAK, Rovena Vodo akuzohet se ka marrë përfitime nga Florida Beu dhe Majlinda Hasani kundrejt emërimeve të tyre në detyrë. Ndërkohë që GJKKO ka caktuar sot masën ‘arrest shtëpie’ edhe për Florida Beun si dhe Majlinda Hasanin. Nga përgjimet e zbardhura dje, rezultoi se Voda kishte marrë në këmbim nga Beu, për punësimin e kësaj të fundit në institucion publik, një shumë prej 1 mijë eurosh, një telefon dhe një arkë me peshk.
Gjykata kundër Korrupsionit dhe Krimit të Organizuar e la në “arrest shtëpie” ish-zv.ministren e Punëve të Brendshme, Rovena Vodo dhe dy avokatet e përfshira në dosjen e saj, Florida Beu dhe Majlinda Hasani. Voda akuzohet se ka marrë 2 mijë euro ryshfet për punësimin e Beut në ministri si specialiste.
INCIDENTI – Në kohën kur Gjykata e Posaçme po caktonte masat e sigurisë për ish-zv.ministren e Brendshme, Rovena Vodo dhe dy avokatet Florida Beu dhe Majlinda Hasani, një incident ka ndodhur në seancë. Florida Beu është ndjerë keq gjatë seancës dhe një ambulancë ka mbërritur dhe e ka dërguar në spital. Në sallë vijoi të ishte e pranishme Voda dhe avokatja tjetër, Hasani.
