Vijojnë kërkimet për kapjen e Erjon Goxharës, efektivi i cili plagosi pak ditë më parë 45-vjeçarin Lorenc Kosta. Pavarësisht thirrjeve të vazhdueshme, Goxhara nuk ka ndërmend të dorëzohet. Në një bisedë me një prej drejtuesve të policisë, ai është shprehur “më mirë vras veten, sesa të kalbem në burg”.
Ndërkohë referuar dosjes hetimore, është zbardhur dhe dëshmia e djalit të Goxharës, i cili ka qenë së bashku me të atin, disa minuta pas krimit të rëndë, teksa Goxhara ishte duke u arratisur në drejtim të Dajtit, ku policia dyshon se është fshehur pas ngjarjes.
“Rreth orës 14:35 më ka marrë në telefon babai im dhe më ka thënë se kishte plagosur Lorencin me armë. Unë e kam pyetur i revoltuar se përse e bëri. Pas kësaj telefonate më ka marrë sërish dhe më ka thënë që të dilja te rrethi i Shkozës pasi do të shkonim në zonën e Freskut. Unë kam dalë në vendin ku më tha ta prisja. Pasi babi ka ardhur te rrethi i Shkozës në këmbë, ne kemi marrë një taksi dhe jemi nisur për në zonën e Freskut.
Sapo kemi mbërritur te zona e Thesarit të Shtetit, kemi zbritur të dy nga taksia dhe shoferit të taksisë i tha të priste kurse mua më tha që ta ndiqja. Menjëherë në këtë moment sapo kemi zbritur na janë afruar 2 punonjës policie të veshur civil të cilët e kanë thirrur në emër babain tim dhe ai sapo i pa u largua me vrap mes pallateve duke u thënë këtyre personave që më mirë vras veten sesa të kalbem në burg”, ka rrëfyer djali i Goxharës.
Ngjarja e rëndë dyshohet se erdhi pas një konflikti për motive xhelozie që punonjësi i policisë së kufirit, Erjon Goxhara tashmë i përjashtuar nga radhët e uniformave blu, kishte me të plagosurin. Ky i fundit vijon të jetë në Spitalin e Traumës në kujdes intensiv, ndërsa policia është në kërkim të autorit. Për kapjen e tij janë angazhuar dhe forcat RENEA si dhe është vënë në dispozicion një shpërblim prej 10 mijë Eurosh për këdo që jep informacion për vendndodhjen e tij.
Bashkëshortja e Goxharës, me të cilin punonjësi i policisë është në proces divorci, ka pranuar raportin intim që kishte me Kostën, me të cilin punonin së bashku në të njëjtin institucion. Pas plagosjes, Goxhara e ka filmuar për disa sekonda Kostën, dhe i ka dhënë edhe një mesazh: Kjo të ndodh kur tenton që të hysh në familjen e tjetrit!
