Në kuadër të sig urimit të vaksinimit të popullsisë kundër Covid-19, ministry i drejtësisë Ulsi Manja ka monitoruar sot procesin në IEVP “Mine Peza” në Tiranë.
Manja ka vlerësuar se fushata e vaksinimit po ecën mirë si tek stafi ashtu edhe tek qytetarët në konflik me ligjin. Ministri ka theksuar se edhe në ambientet e paraburgimit duhet të ecet me ritme të shpejta vaksinimi.
“Duhet të gjejmë politika stimuluese për vaksinimin. Vaksina deri më tani ka treguar që është mbrojtësi i shëndetit edhe në këtë periudhë që po rriten rastet. Prandaj edhe në ambientet e burgimit apo paraburgimit, duhet të ecim me ritme të shpejta vaksinimi, sepse në fund të fundit të paraburgosurit dhe të dënuarit, kanë probleme me drejtësinë, janë në konflikt me ligjin, por meritojnë shërbimet shëndetësore njëlloj si gjithë qytetarët e tjerë”, është shprehur ministri Manja.
Gjithashtu sipas tij duhet të rritet bashkëpunimi me Institutin e Shëndetit Publik, ndërkohë që vaksinimi duhet të përshpejtojë ritmet në të gjitha IEVP.
Ndërkohë Drejtori i Përgjithshëm i burgjeve, Admir Abrija, ka informuar se në të gjitha IEVP janë vaksinuar plotësisht rreth 3600 persona në konflikt me ligjin, ndërkohë që janë rreth 600 punonjës të cilët ose kanë bërë vetëm dozën e parë, ose nuk kanë bërë asnjë dozë. “Në koordinim me Ministrinë e Shëndetësisë ne kemi dy grupe vaksinimi, ndërkohë që na është premtuar se do të kemi vaksina sipas preferencës së personave në konflikt me ligjin”.
Nga ana e tij Drejtori i IEVP “Mine Peza”, ka përmendur faktin se në institucionin që ai drejton, nga personali janë vaksinuar 97 përqind, ndërkohë që qytetarët në konflikt me ligjin janë në masën 65 përqind të vaksinimit të plotë.
