Qeveri shqiptare parashikon rritjen e sigurisë energjetike përmes një sërë projekteve të rëndësishme që aktualisht janë në faza të ndryshme. Në dokumentin e reformave ekonomike 2023-2025 që është në fazë konsultimi nënvizohet se reforma numër 14 është ajo e rritjes së sigurisë përmes promovimit të burimeve të reja të energjisë së rinovueshme por edhe eficiencës.
Në krye të projekteve qeveria klasifikon Hidrocentralin e Skavicës si të parin. “Kontrata e fazës së parë, miratuar me vendim të Këshillit të Ministrave nr. 485, datë 30.07.2021. përfshin aktivitetet paraprake të cilat do t’i mundësojnë Bechtel të paraqesë një propozim tek Autoriteti Kontraktues për kontratën e fazës së dytë dhe do të ndihmojë Programin e Reformës Ekonomike të Shqipërisë 2022-2024. Kontrata e fazës së dytë konsiston në projektimin dhe ndërtimin e hidrocentralit të Skavicës” thuhet në dokument.
Projekti i dytë i rëndësishëm është linja 400 kv me Maqedoninë që nis nga Elbasani dhe përfundon në Bitola. Aktualisht ky projekt është në zbatim.
“Kontrata për Lotin 1 “Linjat” me ofertuesin fitues për këtë lot JV Mitas Energy and Metal Construction Inc – DOKO sh.pk (Turqi & Shqipëri), është nënshkruar më 14.01.2021 dhe ka hyrë në fuqi më 10 mars 2021. Afati/data e përfundimit të projektit për këtë lot është parashikuar 24 muaj nga data e hyrjes në fuqi e kontratës.
Është nënshkruar kontrata për Lotin 2 “Nënstacionet”, me ofertuesin fitues për këtë lot Mytilineos S.A.– Greqi. më 14.04.2021 dhe ka hyrë në fuqi më 27 korrik 2021. Afati/data e përfundimit të projektit për këtë loti është parashikuar 24 muaj nga data e hyrjes në fuqi të kontratës” thuhet në dokument.
Porjekti i tretë është linja e interkonjeksionit 400 kV Shqipëri (Fieri) – Greqi (Arachtos)
“Bazuar në parashikimet dhe potencialet e mëdha zhvillimore të burimeve të rinovueshme, në planet afatgjata të OST, parashikohet ndërtimi i linjës së re të interkonjeksionit 400 kV Shqipëri (Fieri) – Greqi (Arachtos),, me gjatësi rreth 125 km.
Ky projekt synon të forcojë lidhjen ndërmjet sistemeve të transmetimit elektrik të Shqipërisë dhe Greqisë, dhe të rrisë kapacitetin neto të transmetimit të rrjetit shqiptar duke lejuar rritjen e shkëmbimit te energjisë mes dy vendeve dhe reduktimin e sfidave teknike në kuadër të liberalizimit të tregut të energjisë elektrike, por edhe si korridor energjetik drejt Evropës Qendrore dhe Italisë për shkak të vendndodhjes së Shqipërise. OST ka përfunduar studimin e para fizibilitetit të këtij projekti në kuadër të zhvillimit të Master Planit të rrjetit të transmetimit të Shqipërisë deri në vitin 2033” thuhet në planin e reformave ekonomike.
Dy projekte të tjera të rëndësishme që sillen në vëmendje është ai për Parkun Fotofoltaik të Kasravastasë që është në ndërtim dhe atë të Spitallës i cili ende nuk ka filluar të ndërtohet./RevistaMonitor/
