Një aksident i rëndë ka ndodhur paraditen e të hënës në qendër të Tiranës, në unazë, tek ura e vogël e Tajvanit. Një autobuz urban i linjës së unazës së vogël për motive ende të paqarta ka aksidentuar disa makina dhe për pasojë janë plagosur dhjetëra qytetarë. Fatmirësisht ende nuk raportohet për viktima apo të lënduar rëndë. Kalimtarët kanë nxituar për t’ju dhënë ndihmën e parë të dëmtuarve, ndërkohë që aktualisht policia rrugore është në vendngjarje dhe po pritet ardhja e ambulancave. Personat e prekur nga aksidenti janë në gjendje paniku dhe frike, ndaj policia dhe qytetarë të thjeshtë po iu japin ujë dhe po përpiqen t’i qetësojnë sadopak psikologjikisht. Ndërkohë në përplasjen karambol janë përfshirë me dhjëtëra makina. Ky aksident ka ndodhur në orën 11.30. Të plagosur kanë mbetur shoferët e mjeteve që janë përfshirë në këtë ngjarje, por të shumtë janë dhe pasagjerët e urbanit të linjë së “Unazës”. Për shkak të goditjes së fortë, ata janë përplasur ne pjesën e përparme të urbanit dhe në ndenjëset e brendshme. Kujtojmë se autouzët e Unazës janë përfshirë dhe herë tjetër në aksidente, fatmirësisht pa pasoja të rënda. Më herët autobusi “green” i kësaj linje përfundoi në lumin Lana duke shkaktuar çaste tmerri tek pasagjerët.
