Numri i vdekjeve nga Covid-19 në të gjithë botën i ka kaluar 4 milionë, ndërsa Organizata Botërore e Shëndetësisë e quajti këtë “një moment tragik në histori”, duke shtuar se numri mund të jetë më i lartë.
Shefi i OBSH-së Tedros Adhanom Ghebreyesus njoftoi se pika historike ishte arritur, më shumë se 18 muaj pasi virusi u shfaq në Kinë në dhjetor të vitit 2019.
“Bota është në një pikë të rrezikshme në këtë pandemi. Ne sapo kemi kaluar pragun tragjik të katër milion vdekjeve të regjistruara Covid-19, që ka gjasë nënvlerëson numrin e përgjithshëm”, tha Tedros në një konferencë shtypi në selinë e OBSH-së në Gjenevë.
Drejtori i përgjithshëm i agjensisë shëndetësore të OKB tha se disa vende me mbulim të lartë të vaksinimit tani janë relaksuar sikur pandemia tashmë ka mbaruar, duke hequr masat e shëndetit publik dhe duke planifikuar të shpërndanin vaksina.
Por ai tha se shumë vende në të gjithë botën po shihnin rritje të mprehta të rasteve dhe shtrimin në spital, për shkak të varianteve të virusit që lëvizin shpejt dhe një pabarazie tronditëse në aksesin global të vaksinave.
“Kjo po çon në një mungesë akute të oksigjenit, trajtimeve dhe nxitjen e një vale vdekjeje në pjesë të Afrikës, Azisë dhe Amerikës Latine. Nacionalizmi i vaksinave, ku një grusht kombe kanë marrë pjesën e luanit, është moralisht i papranueshëm. Në këtë fazë të pandemisë, fakti që miliona punonjës shëndetësorë dhe të kujdesit ende nuk janë vaksinuar është i neveritshëm”, tha Tedros.
