Prej ditësh situata politike në Shqipëri nuk është aspak pozitive. Edhe pse jemi pak ditë larg nga dita e zgjedhjeve, presidenti Ilir Meta deklaroi jo më larg se dje se zgjedhjet në Shipëri janë imagjinare.
E ndërsa nga ana tjetër, kryeministri Edi Rama e ka kundërshtuar hapur çdo ditë presidentin Meta, ku zgjedhjet e 30 qershorit do të zhvillohen pikërisht të dielën.
Para pak minutash, ish-presidenti Alfred Moisiu së bashku me disa përfaqësues të medias, shoqërisë civile dhe biznesit, dolën në një deklaratë publike drejtuar përfaqësuesve të përtive politike shqiptare në lidhje me krizën politike që ka përfshirë vendin.
Në deklaratën e tij, ish-Presidenti u shpreh se shqetësimi është më i madh se si do të shkojë situata pas 1 korrikut.
Moisiu gjithashtu e ka quajtur të patolerueshme nxitjen e urrejtjes mes shqiptarëve, ndërsa kërkoi gjetjen e një zgjidhje afatgjatë.
“Hapja e negociatave është prioritet absolut kombëtar për vendin tonë. Në shtyrjen e vendimit ka ndikuar edhe kriza në vend. Koha deri në tetor është shumë e shkurtër për të bindur skeptikët.
Kriza po përkeqësohet, ndërsa është afati i fundit për dialog mes aktorëve për të gjetur një zgjidhje afatgjatë, për të mos u kthyer në kriza ciklike. Vlerësojmë të patolerueshme nxitjen e urrejtjes mes shqiptarëve, veprimet e dhunshme ndaj institucioneve, retorika denigruese dhe mungesa e dialogut. Gjithë këto faktorë kanë çuar në cenim të sigurisë dhe qetësisë së qytetarëve”, tha Moisiu.
