Moderna, prodhuesi i një prej tre vaksinave COVID-19 aktualisht i autorizuar për përdorim në SH.B.A., njoftoi të martën se do të fillojë testimin e vaksinave të saj tek fëmijët e moshës 6 muajshe.
Ky veprim e bën Moderna prodhuesin e parë të vaksinave në botë që teston vaksinën e saj tek foshnjat. Procesi i vaksinimit me Moderna do të regjistrojë gati 7,000 fëmijë nga moshat 6 muaj deri në 12 vjeç në SH.B.A. dhe Kanada.
“Fëmijët shpesh kanë nevojë për doza më të ulëta të vaksinave sesa të rriturit dhe ne duam të sigurohemi që të gjejmë dozën më të mirë që rrit imunitetin e tyre”, tha një mjeke pediatre duke shtuar se grupi i parë i moshës që do të fillojë në provë do të jenë fëmijët e moshave 6 deri 11 vjeç, të ndjekur nga fëmijët e moshës 2 deri në 6 vjeç dhe më pas fëmijët nga 6 muaj deri në 2 vjeç.
Vaksinat Moderna dhe Pfizer morën autorizimin e përdorimit emergjent nga FDA në dhjetor. Ndërsa fëmijët nuk janë përballur me aq vdekje nga COVID-19 sa të rriturit, ata përsëri mund të marrin virusin dhe madje edhe më e rëndësishmja, ata mund të transmetojnë virusin tek të rriturit.
Më shumë se 70 milion të rritur në SH.B.A. tani kanë marrë të paktën një dozë të vaksinës COVID-19, ose gati 28% të popullatës së rritur, sipas Qendrave Amerikane për Kontrollin dhe Parandalimin e Sëmundjeve (CDC).
